KTP,VAIRENGTE BRANCH LO INDIN CHHOH DAN TLANGPUI
Vairengte Branch Kristian Thalai Pawl lo indin tan dan hi ziaka felfai taka vawn a nih loh avangin chiangkuang taka thil dik tak hriatchhuah hleih theih a ni lova. Tuna KTP lo indin chhuah dan pawh hi hruaitu hlui ten kum tam tak kal tawh ami an han chhui zau zelna atanga, a ni thei mai awm mang e tia an ngaihruatna te nena tang kawp a phuah chhuah a ni a. A hnuai a mi hi KTP hruaitu hluiten an thil lo chhui chung changa kan biak rawnna atanga Vairengte branch KTP lo indin tan dan kan pawm tlan tak ber a chu a ni.
Kum 1960,October thla khan Kolasib hmunah Presbytery Inkhawmpui hman a ni a. Vairengte atang pawhin Zaipawl te pawh han kalin an mahni tawkah zaithiam an intiin an hlim hle mai a. He Presbytery a kal ve Palai thenkhatte chuan an khuaah chuan Kristian Thalai Pawl an lo indin tawh dante, an tangkai theih ziate an han sawi chuan Vairengte atanga kal Palaite beng a verh ta hle mai a. Inkhawmpui tiak zawh hnua mahni khua ngeia KTP din ve chu Palaite rilruah chuan a lian ta em em mai a ni. Tichuan, hemi kum hian KTP din phalna Kohhranah an thlen hial ta reng a ni. Amaherawhchu, kumte a lo laklawh tawhin kumtawp a lo hnai ta uar mai a, kum 1960 hi chuan KTP hi din a la ni ta lova. Kum 1961, ruahtui tlak hmain Vairengte Branch KTP chu din a lo ni ta a ni.
KTP RISING DAY LO PIAN CHHUAH DAN
Vairengte Branch KTP chu kum 1961-a din anih rual hian a ni leh thla tak hriatchian a la nih loh avangin kum 1994 Branch KTP Committe chuan KTP Rising Day lo hrechianga chhui zau turin Tv.Lallampuia leh Tv.V.Zoliana, Comt.Member te chu a ruat a. An ni hian tih tak zeta beiin, tualchhung mite leh hmun danga lo pem chhuak tawhte pawh umzuiin, an zawtin an chhui chiang zel a. Theihtawp chhuaha an beih ngial pawhin a ni leh thla hriatchian theih a nih tak lovah chuan Kum 1994 Branch Committee chuan lungrual takin Dt.20.Feb.1961 chu Vairengte Branch Rising day atan a lo pawm ta a ni. Dt.20.Feb. hi kum riat chhung Rising day atan hman anih zet hnu Kum 2002, Branch Committee chuan a ni leh thla hi lawm hun atan remchang lo riau va an hriat avangin sawn leh zai an rel a. A chhan chu 20.Feb. hi kum bul anih avangin KTP Member thar tur zawnga Branch Committee a hmanhlel viau lai hun a niin, Branch huam chhung atanga Group a insiam/inthen leh phei chu inpeihna hman rual a ni lova, chuachhapah KTP Member zirlai thahnem tak, hmun danga awmbote an awm ve thin avangin chung hote nena Pawltlak thla, kan awlthawn lai huna Rising day kan hman ho hi kan kokim zawkin kan hlawkpui chhoh zel kan beisei tlat avangin Dt.20.Dec.1961 chu kan Branch Rising Day atan hmang chho in vawiin ni thlengin kan la ring ta zel a ni. Chutichuan, Vairengte branch KTP chu Ni 20.Dec.1961-a din a ni tiin, Central KTP-ah pawh chhinchhiah alo ni ve ta a ni.
