May ni 15, 1950-ah Mizoram chhim lam khaw pakhatah ka piang a. Ka pa India sipai a nih avangin Shillong-ah ka seilian a. Kum 19 ka nihin pasal ka nei a. Ka pasal nen chuan fanau malsawmna kan dawng hle a. Fa pariat lai kan nei ve a. Pathian khawngaihna dawngin tûnah pawh an puitling vek nghe nghe.
Ka pasal nen chuan leilet siamin buh leh bãl lamah pawh malsawmna kan dawng hle a. Fùr lai chuan fùr behlãwi te kan leiletah chuan kan chîng a. Chu chu thlaihnah zuartuten a hmunah an rawn khãr chhãwng a. Keini’n a pawisa fãia hawnin kan thawhrim rah chu hlim takin chhungkuain kan hmang ho thin a. Maruti Car te lei vein concrete In kan sa bawk a. Kan nupa pawh kan inngeih a, chhungkua pawh kan hlim tlâng thin hle.
Chutianga hlim taka kan awm lai chuan kum 2006 a lo inher chhuak a. Chu chu ka tâna lungngaihna kum tur a nih rêng ka lo rin phâk loh laiin zan khat chu kan pa chuan nuthlawi a ngaizawng a ni tih ka hriat rualin kan In chhûngah a rawn hruai lut a. Min luahlan a ni ta reng mai.
Thihna avanga nupa táng then nge nâ ang a, ngaihzâwng dang inneihsan? tih hi ka rirua zawhna awm fo a ni a. Ngun taka ka ngaihtuah pawhin kan hmangaihten min hnâwl tluka ná chu a awm loh ka la ring fo mai. Ka tuar chu a ná ka ti ngawih ngawih a. Ka pasal kha natna avanga boral ni se chuan ka hrethiam thei deuh ang a, ka dinhmun pawh a zahawmin ka hmakhua a êng ve deuh ngei ang tih ka ring thin.
Mahse ka pasal, ka hmangaih ber lak atanga hnâwlna ka dawn tâk miau avangin ka tân kawng zawh tur dang a awm lo va. Ka pate belin Kolasib-ah ka awm ta a ni. Mahse kum 2007 a lo inher chhuak a. Ka pasal hnawhchhuah ka tawh hnua innghahna pakhat la neia ka lo inhriat vena zawng zawng chu tihchhiat a ni leh ta! Ka pa, ka lo thlamuanpui êm êm chuan min boralsan ta tlat a nih chu!
Kum 2007 June thla a lo nih phei chuan kan chhungkaw hlim lai hun, kohkìr ngaihna awm tawh miah lo chu chhui lêtin kan sulhnu te ka ngaihtuah a.
Vanduai ka inti a, innghahna ka nei tawh lo a ni tih ka hriatin ka beidawng a, ka chunga Pathian hnathawh chu hriatthiam harsa ka ti ngei mai. Chutiang thil ngaihtuah chuan ka hun tam zâwk chu ka hmang a. Ka rilru na lutuk thin chuan chaw pawh ka ei thei ngãi meuh lo thin.
Mihring hi rilru hah avanga kan mut theih loh a, chaw pawh kan ei theih loh chuan kan taksa a lo chak lo hma hle a. Natna pawh a lo insiam chawp theih viau a lo ni a. Kei pawh chu ka rilru hah leh rilru na lutuk chuan natna min pe thuai a. Damdawi Ina dah hial ka lo ngai ta reng mai a. Dam zel châkna ka nei pha tawh lo va, thih daih chu ka châk ber a. Mahse ka duh vang ni hauh lovin, midang min tihluihna avangin damdawi Inah chuan ka awm ta a.
Chutianga beidawng leh rilru na ngawih ngawiha damdawi Ina ka awm lai chuan zan khat chu ka chauh lutuk avanga ka muhil lai tak chu ka harh hlawl mai a. Damdawi In sana chu ka han en a, zanlai dâr 12 chiah a ni a. Chutah chuan ka thinlungah Pathian âw a lo thleng a. Chu chu ‘Engkim mai hi i tã a ni asin...’ tih thu hi a ni. Ka harh zui chiang kher mai; muthilh leh rûal a ni tawh lo.
Chu thu chu ka thinlungah a nung reng a. Innghahna nei lo leh beisei bo vek tawha ka inhriatna atang chuan beiseina thar ka neih leh phah a; ka chunga thil thleng pawh lungawi takin ka pawm leh thei ta a ni.
Chuta tang chuan Pathian hruaina ka dawng chho zel a, ka nun pawh a hlim chho ta viau a. Engkim nei ve tawha inngaih hnua hnâwl nih vanga beisei nei lova beidawng tawh chuan beiseina nung ka lo nei ve leh ta a nih chu.
Ka hrisel vak loh avangin kumin(2011) January thlaah khân damdawi Inah ka awm leh a. Kei hmeithai, tisa lama rethei, damdawi Ina ka luh tirh phei chuan Rs. 150 chauh luhpui tur nei chuan damdawi Ina ka awm man zawng zawng, a petu ka hriat hauh loha pêk a ni chu mak ka tih tawh vei nen, ka chhuah rûal chuan Rs. 3000 lai ka hûm haw ta zâwk a nih chu mawle
