ngaina hnam mizote hi kan ni a, chu chu tun thleng pawhin ala dik zel
ani. PIpute hunah chuan khuang bengin an zai thin a, chutianga khuang
benga rampum kan zai lai chuan chanchintha eng kan hmu a, kristianna
kan ramah a lo lut ta a. Kriatianna kan nih hma a kan zai dan thluk leh
zai nan a kan hman thin khuangte chu kan Zosapte khan min hmuh
ramhuai tirin min nam thluk sak ta a.
British duhamna tur chuan chin lem nei loin, mizote chu mi lu
la hnam leh ramhuai be hnamah a chhuah chhe thei ang berin min
chhuah zui ta nghe nghe a. Chutah an culture hmangin Pathian min fak
pui a, keini lahin sap ngaihsanna a khat ngang kan nih avangin sap ho
tih dan anih chuan a kawi a ngilin kan lo zawm thluam thluam bawk si a.
Kristianna a luhin a bilh ah a tho dik ta lo va, kan Kristianna a tak lo va,
vawiin ni thleng hian kan ramin a tuar ta a tih theih awm e.
Kan zosapte khan kan hnam culture leh kan hnam zai dan
thlukte kha min nam thluk sak mai lo in a tir atang khan kan khuang
hmangte khan Pathian min biakpuiin min fakpui ta zawk se chuan
vawiinni a kan ram kristianna belhchian dawl lohnate, hlepruknain kan
ram a tih chhiatna zawngte pawh hi a awm loh mai a rinawm rum a ni.
Mahni culture a tui em em mizote hi kan hnam tihdan phung ang ang
khan Pathian lo fak ta chu ni ila vawiinni a kan hnam sakhuanna ril lo
lutuk te hi tun aia hian a ril zawk lo ang maw tih hi zawhna awm thei a
ni.Rimawi kalphung changkang tak hmanga Pathian fak ka sawiselna ni
lo in, hmanni lawk 2005 leh 2006 chho ah khan Manipur mizo nula
Lalroutmawi rawn inlarin Lengkhawm zai ngei hmangin Zoram dung leh
vang min hrut vel anih kha, khata thil langchiang deuh mai chu mizote
hian rimawi changkang tak tak hmang hian Pathian fak thin mah ila kan
inlungrual tlanna ber chu Lengkhawm zai hi ani.Chumai a ni hleinem
khatia Lalroutmawi rawn lar atang khan Manipur kan mizo unau te nen
a inpawhlo taka awm thin kha kan lo inpawh phah ta a, tunah phei
chuan Churachanpur ah group YMA te hial a lo ding ve ta a ni, hei hi
lengkhawm zaiin a mizote min phuar khawm tlat zia ti langtu kan ni
thei awm e.
Pathianin Mizote hi khuang lova chai thiam tlat lo hnam kan
ni tih hria rengin khawvel a kan Kristian puite neih ve miah loh turin
khaung nena zaia kan chai theih nan Mizo lengkhawm zai hi min pe ta
niin a lang.Zoram harhna thleng tawh zawng zawngte chanchin ziaka
dah te han thlir kir hian lengkhawm zai hian hmun pawimawh tak a
chang zel thian a, heng harhna te hian khuang Pathian fak nan a tlak
loha kan ngaih chu dan rual lohvin a rawn hnuk chhuak leh ta a ni.
Lengkhawm zaia amah kan fak theihna turin Pathianin
Mizote hi kan mi hmasa Patea te, R.L.Kamlala, Suakliana te leh mi
dangte hmangin hla tha tak tak min pe ta ani.Chung hla hmasa te chu
tun thleng hian khawhar inahte, Krismas nikhuate leh Good Friday ni a
Pathian fak nan kan la hmang zel ani. Lengkhawm zai hi kan hnam rohlu
a ni.
Lengkhawm zaia Pathian kan fak nikhua kan zai a that
theihna turin leh kan thiam zawk theihna turin heng te hi hre reng ila:-
lengkhawm zai hi a rang vut vut tur ani lo va, a chuai dap dap tur ani;
Khuangpui leh khuangte kan hmang anih chuan a ri a inchhawn thain a
inmil tur ani, khaung ri hi zaiho aiin a ring tur ani lo; khaungpu chuan
hla sak tur chu a la sang lutukin a la hniam lutuk tur ani lova , a aw
laihawlin hla chu a la tur ani;Hla hriltuin zai ki milin hla a hril tur a ni;
Lengkhawm zai chu a hniam lam hret a sak dap dap tur ani; Zai ho
zawng zawngte an hla thuah an cheng thiam tur a ni.
Kan hnam rohlu lengkhawm zai hi zahpui lo va kan vawn
nun that a pawimawh hle a, Mizote min hipkhawmtu leh inlungruala
min siam theitu ani tih hi theihnghilh lo ila,tun ai hian lengkhawm zai hi
i uar lehzual ang u. Chuti chuan kan hnam culture a hmun pawimawh
tak changtu lengkhawm zai hi thangthar lehzual ten an lo ngaisangin ,
kan hnam thil an lo humhalh thei dawn a ni. He thu hmang hian ka
thuziak kan thlip the ang, “ I RAM LEH HNAM CHHAN LA, TUMAHIN AN
DEM LOVANG CHE”
