(He Lehkhathawn hi ka Fanu Dt 18.9.11 a Durtlang damdawi In a piang tan a ka ziah a ni e..) by engkimaConey
To,
Ka fanu duh tak..
A hmasa in he khawvel a lo piang chhuak tur a pathianin remruat dan hi keini i Nu leh Pa te hian a mak kan ti tawp thei lo a ni.Siamtu chung Pathian hian engkim hi chhan nei leh awmze nei vekin a siam a,kan Fanu ni tur a he khawvel eng i lo hmu hi keini i nu leh pa te hi kan lawm tak zet zet a ni.
He khawvel eng i lo hmuh ve tak ah chuan hringnu ziarang hrilh hria a,zirtir tur che in i nu leh pate hi kan tling tawk lo hle tih kan in hria a,mahse min siamtu chung Pathian kutah kan hlan tawh che a.a ni chuan kawng engkimah min hruai dawn tih kan hria a ni.
Hringnun awmzia bul leh tawp hi hrefiahin hmufiah hmasa la ka duh a ni. ‘Thi turin kan nung a,nung turin kan thi leh dawn a ni’ tih hi..Mitin hian damchan kan nei theuh a,kan hmun dan leh hriat dan a in ang lo mai zawk thin.Mi thenkhat erawh chuan an damchan an hrethiam lo a anmahni nunna ngei an la thin a,a pawi tak zet zet a ni.He khawvela i lo pian chhuah ve chhan hi keinin i Nu leh Pate pawh hian a dik tak chuan kan hrilhfiah theilo che a ni.Amaherawhchu a siamtu che chung Pathian hi hnaih tlat la,zawt la, i duh leh i mamawhte thlen thin ang che..Mi tam tak chuan anmahni duh dan leh tha an tih angin hun an hmang a,an damchhan pawh anmahni tan niin an hre thin.tlirna kawng khat atang chuan a dik mai thei e.Amaherawhchu Pathian hian mihring a siam chan ber chu amah nen a in pawl tur leh he khawvelah hian mihringte hi in lungrual tak a cheng a,in hmangaih tawn a,a thil siamte enkawl turin min duh a ni tih hi theihnghil ngai suh ang che.
I hnenah hian sawi duh tam tak ka nei a,khatia Pi Evi leh Pu Adama ten Thei ei thiang lo an ei tak a vang khan,mihringte hi bawhchhe fa,sual a tlu,hremhmun kal tur kan lo ni ta a.Amaherawhchu Lal Isua krista thisenin Kross a a hnehna avang khan chatuan atan nunna kan lo nei leh ta a ni.Chu thu chu i rin a,i pawm tlat chuan a hnenah ila chawl ve ngei dawn a ni.Piantharna hi danglam hluaina lam emaw,thlarau deuh ruai lam a ni lo a,Lal Isua hi kawng leh thu tak leh nunna a ni a, ama hnen a kal lo chu tumah Pa hnrn an thleng dawn lo a ni.chuvangin amahah hian i rinna leh nunna zawng zawng lo nghat turin ka duh che a ni.A ni tak e..a lehkha thawn che hi a Pathian thu lutuk i lo ti palh a nge?Hei hi hringnun bul tan leh tawp nan hmang turin ka duh vang che a ni.
Mi tam tak chuan Khawvel hi tawp leh tenawm ,In pawngnekna a khat niin an sawi ngei ang,Amaherawh chu nang chuan an thlir dan letling chhiah hian thlir la ka duh a ni.I nu ang hian rilru tha tak nei la,midangte tan malsawmna i nih theih nan i nunah midangte tan hmun kian thin ang che.Duhamna leh Rinawmlohna hian kan Ram leh Hnam a eichhe mek a ni tih hriain Tlemte chungah pawh rinawm la,Diklo tak a sum lakluhna avang a In ropui tak neih aichuan RINAWMNA avangin rethei hi hlau ngai suh ang che.Mihausa an hlim ber lova,chutiangin mirethei poh,mahni chan tawk a lungawite hi he khawvel a miawhawm berte chu a ni.
A tawp berah chuanKeini i Nu leh Pa te hian hmangaih tawp lova kan hmangaihna che aia nasa zawk hianPathian chuan a Hmangaih che a,Hringnunah hian Harsatna te,Tawh sualte i tawk thei.I thil tih ah hlawhchhamna avang a i beidawn rum rum chang pawh i nei ngei ang.Chung hunah chuan Keini I Nu leh Pa te hi i kiangah kan awm zel a ni tih hria la,He Khawvel kan khual zinkawng hi kan lo zawh zo ta a nih pawhin Van atangin kan thlir reng thin che tih hi theihnghilh ngai suh ang che.
Nangmah Hmangaihtute,
I Nu leh Pa
