Kum 1988 a ni a, South Africa mihang hovin mingo te rahbehna lak ata tal chhuah tuma an beihna chuan a vawrtawp a thleng chho mek a, mihang hruaitu ropui Nelson Mandela pawh mingo sorkar-in kum 26 zet Taninah an khung tawh a ni. Mihang te rahbehna thleng mek khawvel mithmuha phochhuak tur leh Nelson Mandela chhuah zalen tura nawrna ni pahfawmin June 11, 1988, Nelson Mandela kum 70 tlin champhaphakah London khawpuia an Stadium chhuanvawr, Wembley Stadium-ah Free Nelson Mandela Concert ropui tak an buatsaih a. A hun laia zaithiam lar leh Rock Band engemawzat an fuankhawm a ni.Mi sing tam lenna Wembley Sta-dium-a leng lo mipui an pungkhawm a, Rock Music ri bur bur karah zu leh drugs rui phual tawh mipui sahawk an phu luilui a. Chutihlai chuan mihang nula, Jessye Norman-i chu African kawrfual tle zak mai Dashiki hain Stage-ah a lo pen chhuak a. Spotlight eng bial kulh mai chuan chu mihang nula lian tak, puibawmtu Band emaw Musical Instruments emaw tel hauh lova amah chauhva lokal chu a chhun a. Rock Music-in a bual at mipui zingah Opera zaithiam Jessye Norman-i hmelhriattu reng an awm lo. Mipui bengchheng ri nuaih nuaih karah pa pakhat hian ring zetin, “Guns & Roses” tiin a rawn au a, chu chu midangin an zawm chhunzawm ve bawk a. Jessye Norman-i chuan aw tliang mawi tak, rimawi tel hauh lo hian he hla hi a rawn sa a :
Khawngaihna mak mawi leh duhawm,
Sual riangvai chhandamna;
Suala bo hnu min zawng hmu ta,
Mitdel mitvarna chu.
Wembley Stadium-ah chuan thilmak a lo thleng ta! Awmngaihna hre lo mi 70,000 pungkhawm chu khap ngai miah lovin thawklehkhatah an reh ta thuap a!
“Hlauhna hmuna ka awm min hrilh,
Ka hlauh min hnehsak ta...”Khawngaihna mak mawi leh duhawm,
Sual riangvai chhandamna;
Suala bo hnu min zawng hmu ta,
Mitdel mitvarna chu.
Wembley Stadium-ah chuan thilmak a lo thleng ta! Awmngaihna hre lo mi 70,000 pungkhawm chu khap ngai miah lovin thawklehkhatah an reh ta thuap a!
“Hlauhna hmuna ka awm min hrilh,
tia chang 2-na a sak thlen chuan mipui chu Norman-i kutah an awm vek tawh. Chang thumna a sak thlen meuh chuan mipui sing tel teh meuh chuan an hriatrengna kil khata lo la chambang ve hram hram hla thu chu an phawrh chhuak a, Jessye Norman-i zai chu an zawmta thup thup a. Khawngaihna chaka tuihal khawvel hian Khawngaihna mak mawi leh duhawm hmaah sawi tur reng a neilo.
